Presidencialet në Slloveni, Turk favorit për mandatin e dytë

Sllovenët votojnë për presidentin e ri të vendit, në një garë ku duket se presidenti aktual, Danilo Turk, pritet të marrë mandatin e dytë pesëvjecar. Sondazhet e nxjerrin presidentin në avantazh ndaj dy kandidatëve të tjerë kryesorë, ish-kryeministrit, Borut Pahor dhe liderit të një partie të qendrës së djathtë, Milan Zver. 

Votuesit e parë në rrugët e Ljubjanës janë shprehur optimistë se zgjedhjet do të vendosin Slloveninë në një situatë të qëndrueshme për të ecur përpara në zhvillimin ekonomik. Të tjerët mendojnë se presidenti do të bëjë pak në zbatimin e angazhimeve të mëdha që ka marrë përsipër.

"Nuk pres ndryshime të mëdha, partitë politike nuk arrijnë të merren vesh dhe njerëzit kanë shumë probleme të tjera për të pasur mendjen se kush do të jetë presidenti", thotë një banor i kryeqytetit.

Këto zgjedhje presidenciale në Slloveni kaluan përmes një fushate elektorale mjaft të qetë dhe pritet që fituesi të vendoset me balotazh në një raund të dytë, mes kandidatëve me më shumë vota.

Sllovenia u anëtarësua në Bashkimin Europian në vitin 2004 dhe përshtati euron si monedhë të përbashkët në vitin 2007. Por, papunësia e lartë dhe rritja e kredive të këqija në bankat shtetërore kanë rritur shqetësimin ëpr perspektivën e saj ekonomike. Që nga nisja e krizës financiare në Europë, edhe ekonomia e Sllovenisë ka përjetuar rënie të thellë. 

Albanian Screen