Stina e një mercato-je masive

Një ditë po e një ditë jo del një lajm mbi një socialist lokal, që ka kaluar në kampin tjetër. Ngjarja më e rëndë në këtë  drejtim u regjistrua me deputetin Vangjel Tavo, i cili ndërroi fanelën e PS-së me atë të LSI-së, ndërsa ngjarja më e freskët është ajo e Vlorës, ku ish-kryetari i PS-së, Kujtim Sulçe, u hodh gjithashtu me LSI-në. Në një intervistë për Shekullin, Sulçe e motivon largimin e tij nga PS-ja me pakënaqësitë ndaj Ramës e ndaj mënyrës se si ky drejton partinë më të madhe të opozitës. Ndërsa për afrimin tek LSI-ja, thotë se “zgjodhi LSI-në si parti të re, si pati të majtë që lufton dhe mbron idealet e luftës nacionalçlirimtare, si parti që punon dhe lufton për integrimin e vendit.”

Në disa rrethana nuk është personi që ikën në krahun tjetër, por vota e tij. Në disa këshilla të njësive të qeverisjes vendore ka ndodhur që një numër i caktuar këshilltarësh të koalicionit opozitar t’i bashkojnë votat me maxhorancën, dhe kështu drejtimi i këshillit kalon në duart e pushtetit, sidoqë opozita ka një shumicë të qartë në të njëjtin këshill. Dje, fjala vjen, maxhoranca mori dhe “postin” e kryetarit të Këshillit të Qarkut të Vlorës. Nuk i duhej një votë, as dy, për ta marrë këtë “post”. I duheshin nja dhjetë vota. I gjeti që të gjitha. Dhe kryetar në një Këshill, ku opozita ka 13 vota më tepër se sa maxhoranca është zgjedhur kandidati i së djathtës. Çfarë po ndodh? S’do ish keq që Rama t’na e shpejgonte me ndonjë “editorial”.

E.G.