Sigurimet, AMF: Ulja e çmimeve, e pazakontë

Ulja e menjëhershme e çmimeve të policave të sigurimit nuk ishte në të mirën e përdoruesve të automjeteve. Kjo është ajo ç’ka orvatet të shpjegojë Autoriteti i Mbikëqyrjes Financiare, nëpërmjet një lajmërimi për mediat, pas shtrenjtimit të siguracioneve, e cila dyshohet se është bërë me marrëveshje midis siguruesve.

Argumenti që përdor autoriteti është ky: “Çmimet e aplikuara që prej shtatorit 2011 kur edhe u liberalizua tregu nuk ishin reale dhe pasqyrë e tregut të sigurimeve në vend”. E përkthyer me fjalë të tjera, AMF kërkon të tregojë se ulja e primeve ishte aq e madhe pas liberalizimit të tregut sa rrezikoi që kompanitë të mos kishin të ardhura të dëmshpërblenin të siguruarit. Në këtë kontekst, shtrenjtimi sërish, madje i menjëhershëm i policave sipas saj, përkthehet si një vendim në të mirë të të siguruarve dhe kompanive

Me çmimet e reja, Sigurimi i Detyrueshëm Motorik (TPL-ja) për automjetet deri në 1 600 kubik, është mesatarisht 14 000 lekë, ndërsa për ato me fuqi më të madhe vërtitet në rreth 14 600 lekë. Me liberalizimin e tregut, çmimet varionin nga 4 500 deri në 6 000 lekë.

Para se të liberalizohej tregu, çmimi për autoveturat varionte nga 7 mijë deri në 8 500 lekë, në varësi të fuqisë motorike. Kjo është pasqyra e çmimeve para, gjatë dhe pas liberalizimit të tregut të sigurimeve, ku secili e bën vetë llogarinë.

S.E.