Paloka: Meksi nuk është çmendur të bëhet me Topin. Në fakt, “Meksi është çmendur”

Aleksandër Meksi ka dhënë një intervistë për gazetën Telegraf me rastin e 22 marsit, përvjetorit të fitores së parë të demokratëve në vitin 1992. “Unë jam krenar për atë datë”, thotë Meksi, por në të njëjtën kohë nuk heziton të përsërisë kritikat ndaj PD-së së sotme, madje dhe ndaj pompave, me të cilën po festohet 20 vjetori i asaj ngjarjeje. Me pak ironi, ai thotë diku se “shqiptarët duhet të festojnë të gjithë sot, pasi është dita e ashures”.

Flitet se ish-kryeministri Meksi është një ideatorët e nismëtarët e themelimit të partisë së re të pagëzuar hë për hë si Partia Topit, por ai vetë deri tani nuk e ka konfirmuar këtë gjë. Për përfshirjen e tij në këtë projekt kanë folur të tjerët, e jo ai vetë. Mirëpo, njerëz të mirinformuar vënë dorën në zjarr që ai është ‘pjesë e lojës së re’. Demokratët duhet të jenë të mirinformuar, gjithashtu, mbi këtë fakt, por Ed Paloka bën sikur s’e di. Sipas gazetës Tema, ky i fundit ka thënë: “Nuk besoj se zoti Meksi ka luajtur nga mendtë pas 20 vitesh që të shkojë e të bashkohet me atë parti”.

Por siç e thamë, gjasat janë që “Meksi të ketë luajtur nga mendja”.

E.G.