Shqipëria, superfuqi e vogël edhe në teknologji! Kështu thotë Kryeministri

Kryeministri Berisha shfrytëzoi sot një organizim rutinë në Ministrisë së Arsimit për të shpalosur vizionin e qeverisë në drejtim të dixhitalizimit të arsimit. Sipas tij, në vend duhet të nisë gara për ta shndërruar vendin në një superfuqi të vogël (edhe supërfuqi edhe e vogël ??!) të teknologjisë, përmes nxitjes së aftësive programuese të të rinjve. Ja një pjesë e fjalimit: Ne sivjet do të realizojmë internetin në çdo klasë, por ne duhet të ndezim garën që Shqipëria të kthehet në një superfuqi të vogël në këtë fushë. Ne duhet të përcaktojmë një seri stimujsh konkretë për të nxitur programet e nxënësve dhe studentëve tanë. Të bëjmë gjithçka për të krijuar kushte për sipërmarrjen e inovacionit, e cila është meritë e moshës së shkollarëve dhe passhkollarëve.

Që Berisha e ka tepër për zemër fjalën “super fuqi e vogël”, këtë e kishim kuptuar që prej dhënies së qindra lejeve për ndërtimin e HEC-eve (aktualisht prodhojnë energji vetëm një numër i kufizuar), por nuk pritej të paktën ta përdorte edhe fushën e teknologjisë së informacionit. Tani gjigantët e fushës, si Microsoft apo dhe të ngjashmit do të na kenë zili.

S.E