Kastriot Islami u shkel syrin të gjithëve

Pasi u bë vota e 71-jtë në parlament gjatë votimit mbi anëtarin e KLD-së, Kastriot Islami po jeton një moment gjigandomanie. I ka të gjitha arsyet të mendojë se vota e tij do të kërkohet edhe në ditët e javët në vijim, e prandaj ka zënë të flasë për “maksimalizimin e kësaj vote” (i duhet hequr kapelja për shpikjen e kësaj fraze: maksimalizim i votës), e ndërkohë po ia lë të hapura të gjitha dyert vetes. Në një intervistë me Ilva Taren, ai tha se “me Ramën kam pasur marrëdhënie korrekte; nuk kemi patur asnjë tensionim; nuk kam asgjë personale; dhe pas largimit nga PS-ja, marrëdhëniet kanë qenë gjithashtu korrekte”. Një kjo. Ai tha pastaj, se “votova kundër Vishës, pasi isha pro socialistëve të vërtetë”. Dy kjo. Më tej ai u shpreh se “nuk kam asnjë kompleks të takoj Berishën; Berisha mund të ishte një President që do ta kryente mirë punën; do ta maksimalizoj votën time presidenciale, dhe kjo votë do të jetë në varësi të kandidatëve”. Tre kjo. Ka dhe një të katërt, kur ai ia bën me sy Metës e LSI-së. “Kjo maxhorancë ka dhe elementë të majtë”, tha ai.

Re.Pu.