Aleanca Kuqezi kalon nga sloganet në një program më të detajuar

Deri më sot, Aleanca Kuqezi ka publikuar një “kontratë” me 10 pika, të cilat janë në nivelin e sloganeve. Njërin nga këto slogane, “Drejt një tregu të përbashkët mbarëshqiptar”, ajo e shtjelloi sot në një tryezë me specialistë të sektorit të ekonomisë, financave dhe strategjive zhvillimore. Tryeza nisi me fjalën hyrëse të Dashamir Uruçit, i cili prezantoi “vizionin kuqezi” të rimëkëmbjes së ekonomisë shqiptare dhe aspektet teknike të fuqizimit të tregut vendas dhe atij rajonal. Sipas tij, unifikimi i politikave eknomike dhe integrimi ekonomik Shqipëri-Kosovë do të jetë një mekanizëm i rëndësishëm i zhvillimit ekonomik të trevave shqiptare.

Ndërsa Kryetari i Aleancës Kuq e Zi, Kreshnik Spahiu, u ndal në disa pika të rëndësishme të “vizionit kuqezi” për ekonominë shqiptare. Spahiu vuri theksin tek riindustrializimi dhe strategjia e rimëkëmbjes ekonomike mbarëkombëtare e cila bazohet në udhën e re, ose sikundër njihet ne sektorin ekonomik “rruga e tretë”. “Rruga e tretë është kundër socializmit ndërkombëtar dhe kapitalizmit liberal. Në “rrugën e tretë”, shteti duhet të luajë një rol aktiv në ndërmjetësimin midis klasave, të inkurajojë arritjen e fitimeve private dhe ofrojë shumë nxitje ndaj bizneseve, por kërkon gjithashtu që si shpërblim i gjithë aktiviteti ekonomik t’i shërbejë interesit kombëtar”, theksoi Spahiu.

Duke u ndalur më tej në detajet teknike të programit të Aleancës Spahiu u shpreh se “Këtë sistem ekonomik Aleanca Kuq e Zi do të zbatojë me ardhjen e saj në pushtet për rimëkëmbjen e ekonomisë shqiptare me qëllim rritjen e pasurisë dhe mirëqenies kombëtare, nëpërmjet ndërhyrjeve qeveritare në ekonomi, duke ndryshuar strukturën e ekonomisë shqiptare dhe aftësimin për sfidat e shekullit të XXI, duke e kthyer në ekonomi eksporti, duke mundësuar kthimin e emigrantëve dhe duke unifikuar realisht tregun kombëtar Shqipëri, Kosovë, Maqedoni dhe Mali I Zi” – deklaroi Spahiu.

Spahiu bëri të ditur përpara ekspertëve dhe profesionistëve të pranishëm në tryezë se Aleanca Kuqe  Zi do të ngrejë institucionin teknik “Bordi i Inteligjencës Ekonomike” i cili do të menaxhojë programin ekonomik strategjik dhe që do të jetë i përbërë nga ekspertë profesionistë vendas dhe themelet e para për këtë institucion tashmë kanë nisur.

Bursa e Tiranës deklaroi Kreshnik Spahiu do të jetë një detyrë imediate e qeverisë së ardhshme vijoi Spahiu, pasi mungesa e kësaj bursë ka sjelle dhe mungesën e kapitalit të madh. “Bursa është parlamenti i ekonomisë dhe zemra e kapitalizmi, vetëm nëpërmjet bursës do të arrihet që populli të jetë aksioner i pasurive kombëtare, vetëm nëpërmjet bursës do të konsolidohet ekonomia e të gjitha trojeve shqiptare dhe do të rritet interesi për investimet e brendshme në korporatat e mëdha” deklaroi Spahiu.

“Ky është një revolucion ekonomik mbarëkombëtar që ne do ta jetëzojmë sapo të ndryshojmë regjimin politik. Shqipëria është një vend i varfër sepse drejtohet nga mendje të varfra. Ky vend po kthehet në një shkretëtirë afgane nga këta politikanë talebanë. Aleanca Kuq e Zi do ta ndryshojë këtë realitet për të gjithë popullin shqiptar,” e mbylli fjalën e tij Spahiu.

Sado ende i padetajuar mire, ky program i AK-së është më mirë se sa një slogan i shkurtër në kontratën me 10 pika.

Re.Pu.