Paloka i bën fresk Bashës dhe sulmon Patozin: Ai akuzon se është mik i Olldashit

“Gjylja e madhe plasi!”, do të thoshte Plaku Mere tek filmi “Njeriu me top”. Megjithatë, në Partinë Demokratike duket se jemi ende në fillimet e një përplasjeje mediatike mes atyre që mbështesin fort kryetarin e ri, Lulzim Basha, dhe ata që kundërshtojnë zgjedhjen e tij. Pas deklaratave të Astrit Patozit për garë të paracaktuar në PD, ka reaguar sot në Gazetën Shqiptare, deputeti Edi Paloka, i cili e ka vlerësuar procesin e zgjedhjes së Bashës në krye të PD-së si më të mirin e mundshëm. “Ta njollosësh këtë proces në një kohë që u mor me entuziazëm nga të gjithë anëtarët e PD-së, nuk është aspak në favor të PD-së dhe as të atyre që presin një ringritje të PD-së. Për më tepër kjo njollosje bëhet për arsye subjektive. Arsyeja është e thjeshtë: Të gjithë e dinë që z.Olldashi është mik i afërt i tij [Patozit], por kjo nuk e justifikon një qëndrim të tillë të nënkryetarit të PD-së”, ka sulmuar Paloka. Sipas Palokës, Patozi duhet të ishte marrë më shumë me Edi Ramën dhe PS-në, dhe jo të sulmonte procesin zgjedhor të PD-së. E thënë ndryshe, të mos dilte nga rreshti.

r.k