Franca e përgjuar “kombëtarisht” nga NSA, Parisi acarohet

Ironikisht, sot që e përditshmja pariziene “Le Monde” publikoi një artikull ku thuhet se Agjencia Kombëtare e Sigurisë e SHBA-së, NSA, ka përgjuar më shumë se 70 milionë telefonata të francezëve, mbërrin për vizitë në Paris sekretari i Shtetit Kerri, për të diskutuar forcimin e bashkëpunimit për zgjidhjen e krizës siriane. Artikulli-bombë bazohet në informacionet e nxjerra nga dokumentet e Eduard Snoudenit, dezertorit të CIA-s. Sipas gazetës, jo vetëm terroristët e dyshuar, por edhe biznesmenë të lartë dhe figura të njohura politike kanë qenë pjesë e përgjimeve. Ministri i Jashtëm francez Loran Fabius thirri për shpjegime ambasadorin amerikan Rivkin, teksa deklaroi: “Këto lloj praktikash mes partnerëve që cënojnë privacinë, janë totalisht të papranueshme dhe duhet të sigurohemi menjëherë, që të tilla bëma të mos përsëriten më”. Le Monde bën fjalë për një fushatë masive përgjimesh telefonike dhe elektronike mes datave 10 dhjetor 2012 - 8 janar 2013, ku janë përgjuar 70.3 milionë thirrje. 

Sekretari Kerri, për t’i hedhur pak ujë këtij zjarri, deklaroi me të mbërritur se Franca ishte “aleati më i vjetër” i SHBA-së, padyshim duke kërkuar rrënjët e miqësisë në luftën revolucionare amerikane kundër kurorës britanike.  

a.k