FIFA: Shqipëria nuk ka stadium sipas standardeve, kombëtarja shqiptare mund të mos luajë më në Shqipëri

Shqipëria rrezikon të luajë në “transfertë” edhe ndeshjet në “shtëpi”. Këtë e ka konfirmuar zv/sekretari i Përgjithshëm i UEFA-s dhe njëkohësisht shefi i Komisionit të Federatave të këtij institucioni, Teodor Teodoridhis, i cili ka qenë në Shqipëri për të “zyrtarizuar” këtë paralajmërim të ndërkombëtareve edhe para përfaqësuesve të qeverisë së re në vendin tonë. Siç shpjegoi vetë përfaqësuesi i UEFA-s, ky takim ishte për të diskutuar bashkërisht opsionet që shfaqen dhe për të gjetur një zgjidhje sa më të shpejtë, pasi në shtator Shqipëria nis kualifikueset e Euro 2016.

Nëse më parë ky “kërcënim” është dukur thjesht një mënyrë për të përshpejtuar bashkëpunimin mes shtetit shqiptar dhe FSHF-së, këtë radhë  ekziston mundësia konkrete që kombëtarja shqiptare të mos luajë më në Shqipëri.

Stadiumi ‘Qemal Stafa’ aktualisht nuk përmbush kriteret. Presidenti i FSHF-së, Armand Duka, ka bërë të qartë se institucioni që ai drejton nuk ka një buxhet për të përballuar rikonstruksionin. “FSHF-ja është e pamundur që të financojë dhe nuk është detyra e saj, ka thënë Duka, duke u treguar skeptik në këtë ccështje duke thënë se s’ka para dhe s’mund të bëhet asgjë.

Zh.