Politikë

Donald Lu shpreson se të rinjtë mund ta ndryshojnë Shqipërinë, duke i ftuar të bëhen pjesë e politikës. Në një takim me studentë ai la të kuptohet se klasa aktuale politike nuk është e aftë t'i ndryshojë gjërat dhe u bëri apel të rinjve të mos largohen nga Shqipëria, por të investohen për t'u bërë pjesë e vendimarrjes.

Perceptim apo realitet, situata me kultivimin dhe trafikimin e kanabisit po i shërben Koço Kokëdhimës për të sulmuar qeverinë dhe ish-mikun e tij Edi Rama, i distancuar ndjeshëm nga -ish deputeti dhe botuesi Kokëdhima që pas heqjes së mandatit të deputetit nga Gjykatë Kushtetuese. I ftuar në emisionin Top Shoë, Kokëdhima foli për një situatë të kultivimit të kanabisit më të rëndë sesa në qeverinë Berisha dhe paralajmëroi tensione sociale nëse nuk do të merren masa për luftimin e fenomenit.

Shtabi i Përgjithshëm i ushtrisë shqiptare njoftoj se sot ndodhet në vendin tonë një ekip i Federatës Ruse në cilësinë e inspektuesit së Armë – Kontrollit. Shtabi i ushtrisë shqiptare sqaron se kontrolli është rutinë pas aplikimit që ka bërë Federata Ruse në përputhje me një dokument ndërkombëtar që quhet “Dokumenti i Vjenës”.

Kryeministri Edi Rama dhe disa deputëtë apo ministra pas tij po e mbrojnë ligjin për importin e mbetjeve duke dhënë garanci për listën e mbetjeve që dontë riciklohen dhe me faktin se kështu do të ketë efekte pozitive edhe mbi mjedisin. Po kështu kryeministri ka theksuar disa herë se ky nuk është i njëjti ligj me atë të vitit 2011, por po verifikohet se këto argumente nuk po bindin shumëkënd. Aleanca Kundër Importit të Plehrave ka shpërndarë një deklaratë pas takimit që Rama zhvilloi me kompanitë e riciklimit.

Ka qenë i ashpër debati në emisionin "Njerëz në fokus" në News24 ku diskutohej për ligjin e mbetjeve. Një aktivist, Klodi Leka, është përplasur me deputetin socialist Besnik Baraj, ndaj të cilit nuk ka kursyer fyerjen.

Kur debati për ligjin e importit të mbetjeve po orientohet drejt një referendumi popullor, opsion që ka marrë së fundmi mbështetjen e opozitës, deputeti Ben Blushi thotë se kryeministri Rama nuk do të lejojë referendumin për këtë çështje.

Sot u bë e ditur në media se dje në mbrëmje në kryeministri ka qenë për një takim me kreun e qeverisë, ambasadori amerikan Donald Lu dhe Aleksander A. Arvisu. Në të kanë marrë pjesë edhe kryetari i Bashkisë së Tiranës, Erjon Veliaj dhe nënkryetari i Grupit Parlamentar të Partisë Socialiste Taulant Balla.

Ministri i Drejtësië, Ylli Manjani ka deklaruar sot marrjen e disa masave që kanë të bëjnë me çështjen e biznesmenit libanez ë krye të kompanisë Omnix. Manjani ka akuzuar Avokaturën e Shtetit, gjyqtaren Joana Qeleshi si dhe ka bërë të ditur masat dhe nismat që do të merren. Më poshtë deklarata e ministrit që mund të cilësohet reagimi i parë nga qeveria për të bërë diçka konkrete rreth një problemi që solli largimin e biznesmenit Faadi Mitri.

Mustafa Nano ka përsëritur sot qëndrimin e tij rreth problemeve të qeverisjes së Edi Ramës, kur përmes një interviste në gazetën “Panorama” ka theksuar sërish akuzat e tij.
“Por nuk është vetëm kjo. Rama ka bërë gjëra më të rënda. Dhe më e rënda është se ai ka krijuar një klikë të tijën, që në një masë të madhe është e njëjta klikë e vjetër që sundonte edhe në kohën e Berishës. Hiq këta që bilbilosin nga Shqupi sot, të tjerët janë ata që ishin. Klika është e palëvizshme.
Dhe Rama do që gjithë Shqipërinë ta vërë në shërbim të kësaj klike”, është shprehur Nano.

Një arrestim i djeshëm për drogë i policisë së Lezhës, çuditërisht u la në heshtje nga Partia Demokratike, ndonëse ajo është investuar fort në denoncimin e rasteve të trafikut të drogës. Për më tepër që arrestimi në fjalë ishte një rast i artë për opozitën, nisur nga personi dhe lidhjet e tij me strukturat shtetërore.
Bëhej fjalë për arrestimin e Pajtim Agës, i cili sipas syri.net është vëllai i shefit të komisariatit të Dibrës, Bert Aga, të cilin opozita e akuzoi si një nga organizatorët e skemës kriminale të blerjes së votave në Dibër me para të trafikut të drogës.