Zaloshnja në NEWS24: Rreth 5000 vota epërsi e Filos ndaj Stratobërdhës në Korçë

I ftuar në studion e NEWS24, Eduard Zaloshnja bëri një parashikim të rezultatit të zgjedhjeve të sotme në Bashkinë e Korçës, bazuar në shifrën e pjesëmarrjes dhe në të dhënat e një sondazhi telefonik të zhvilluar prej tij para një muaji. Sipas Zaloshnjës, kandidati socialist Sotiraq Filo do të ketë një epërsi ndaj kandidatit demokrat Sotiraq Stratobërdha prej rreth 5000 votash (plus-minus disa qindra).

Këtë parashikim ai e bazoi te fakti se në sondazh rezultonin rreth 12500 votues të vendosur për Filon qysh para një muaji dhe rreth 8000 votues të vendosur për Stratobërdhën, ndërkohë që sot morën pjesë në zgjedhje gjithsej rreth 22000 votues. Meqënëse sondazhi i tij nuk përfshinte lagjet 6 dhe 8 (ku jeton komuniteti egjyptian dhe rom), Zaloshnja presupozoi se e majta do të ruajë atje epërsinë prej rreth 500 votash që pati në zgjedhjet e fundit parlamentare.

Pra, në total, ai parashikoi një epërsi prej rreth 5000 votash për Filon, ndërkohë që partitë që e përkrahën këtë kandidat të majtë patën një epërsi prej rreth 9000 votash në 23 qershor. Rezultati paraprak i garës pritet  të mësohet nesër pasdite, me mbarimin e numërimit që sapo ka filluar.

Re.Pu.