Ylli Pango kërkon mirëkuptimin e opinionit publik: O njerëz, më janë qepur me gurë në trastë

Ylli Pango është gjendur sërish në syrin e një cikloni mediatik. Kontrolli i Lartë i Shtetit ka nisur një denoncim në prokurori, dhe ky denoncim ka të bëjë me Ministrinë e Kulturës në kohën kur atje ish i parë Ylli Pango. Disa media i kanë dhënë hapësirë këtij lajmi, gjë qe ka bërë Pangon të ulet e të shkruajë një artikull. E ka publikuar në Mapo, dhe u drejtohet qytetarëve. Duket se e ka përjetuar keq këtë ngjarje.

E fillon shkrimin me një apel të pazakontë: “O njerëz, i miq, o media që ma bëtë emrin copë, ju lutem ….”. Dhe më poshtë futet në thelbin e kësaj që ka ndodhur, duke treguar me gisht si fajtor kruen e KLSH-së, Bujar Leskajn. Pango është i zemëruar dhe me faktin që disa media as nuk e kanë kërkuar një opinion të tijin para se të raportonin mbi denoncimin e KLSH-së, as e kanë publikuar një opinion të tijin, kur ky vetë ua ka dërguar (me urdhër të pronarëve, thotë). Shkrimin e mbyll me një P.S.: “Nuk i trembem asgjëje; urrej padrejtësinë e poshtërsinë me gjithë shpirt”.

Ndërkohë Panorama online informon se “prokuroria ka vendosur mosfillimin e hetimeve për kallëzimin penal të Kontrollit të Lartë të Shtetit (KLSH) ndaj Ylli Pangos, drejtor i Përgjithshëm i Agjencisë së Kërkimit, Teknologjisë dhe Inovacionit”. Nuk flitet për kallëzimin lidhur me abuzime të hamendësuara në Ministrinë e Kulturës e të Turizmit.

Re.Pu.