Takim i dytë Berisha-Rama?

Ora News ka përhapur lajmin se do të ketë një takim të dytë Rama-Berisha. Ai do të mbahet nesër (ora është për t’u saktësuar). Ky lajm, që ka nevojë të konfirmohet deri në fund, vjen pas deklaratave të Metës e Ramës gjatë ditës së sotme. I pari foli për “nevojën e domosdoshmërisë për gjetjen e konsensusit, për t’i dhënë fund kapriçove, pasi kemi djegur tre raunde për konsensusin”. Dhe shtoi se “duhet një takim në nivelet më të larta, të zotit Berisha dhe zotit Rama deri ditën e nesërme, në mënyrë që këto 48 orë të gjendet konsensusi dhe ditën e hënë të përfundojë procesi i presidentit të ri”.

Ndërsa Rama vijon të kërkojë konsensus, pa dhënë ndonjë emër të vetin. Sot ai është shprehur, se “ne jemi pakica; nëse do të ishim shumica, nuk do të ishim ngritur nga tryeza, pa i dhënë zgjidhje këtij procesi; ne jemi të gatshëm të ulemi me këdo, për të gjetur një zgjidhje; ne nuk jemi për një proces të njëanshëm”.

Re.Pu.