Shtohet numri i kosovarëve që vijnë sot për... plazh?

Vetëm gjatë 24 orëve të fundit, rreth 6 mijë qytetarë nga Kosova kanë kaluar përmes pikës kufitare të Vërmicës për në Shqipëri, njofton Top Channel. I pyetur nga media, një rreshter policie ka deklaruar dje në drekë se vetëm “brenda 24 orëve të fundit kanë kaluar nga Kosova në Shqipëri rreth 3 mijë automjete dhe 6 mijë persona. Këto janë të dhënat që kemi për 24-orëshin e fundit”, ndërsa fluksi vazhdoi të rritej në orët në vazhdim.

Sipas Policisë së Kosovës, numri i shtetasve që kanë kaluar për në Shqipëri është më i madh në krahasim me të njëjtën periudhë të përpara një jave dhe kjo, sipas tyre, ndodh për shkak të përmirësimit të kushteve atmosferike. Duket se policia e Kosovës nuk sheh parashikimet e motit.

Madje dhe qytetarët kosovarë të pyetur kanë dhënë përgjigje të tipit: “Kam disa të afërm dhe duke pasur pak kohë të lirë, mendova që ta shfrytëzoj këtë periudhë e t’i vizitoj”. Gjithsesi, ky fluks ka shumë gjasa të çojë përveç plazhit edhe ca vota në kuti votimi. Vazhdon të mbetet e vlefshme pyetja, edhe pse mund të kenë pasaportë shqiptare, a kanë të drejtë të vendosin për fatin politik në Shqipëri njerëz që vijnë vetëm për 2 javë plazh?

k.c.