SHËNIM: Shkëlqimi dhe rënia e yjeve të Grillos

Rezultati i zgjedhjeve të fundit lokale (26/27 maj turni i parë dhe 9/10 qershor turni i dytë), shënoi një rënie vertikale të votave për “Lëvizjen 5 Yje” të Beppe Grillos. Në çdo komunë përqindja e konsensusit të kandidatëve me 5 yje u përgjysmua në raport me shpërthimin që Lëvizja pati në zgjedhjet e përgjithshme të shkurtit të kaluar. Por cilat janë shkaqet e shfryrjes kaq të bujshme të një “tsunami” që premtonte revolucion por që rrezikon të fundoset nga vetë dallga që krijoi? Si gjithmonë arsyet janë të shumta, por unë mendoj se dy janë motivet kryesore që po gërryejnë popullaritetin e krijesës së Grillos.

E para, dhe më e rëndësishmja, është aleanca e munguar me Partinë Demokratike që coi në dorëheqjen e Bersanit dhe në krijimin e një mazhorance të “panatyrshme” me të djathtën personale të Silvio Berluskonit. Një koalicion pas-zgjedhor qeverisës midis Lëvizjes dhe PD-së ndoshta do krijonte ekzekutivin më reformues dhe progresist në historinë demokratike italiane. Por kjo nuk ndodhi sepse linja e Grillo-s ishte e prerë, pa kompromise dhe si rrjedhojë aspak politike. Partia më e votuar në rang republike vendosi të qëndronte në opozitë, duke djegur të gjitha propozimet e Bersanit. Ky i fundit, me koherencë të plotë, pranoi humbjen e bastit dhe ‘hapi krahun’. Padyshim Grillo kishte letrat më të mira në pokerin politik të krijuar pas zgjedhjeve të shkurtit, por thjesht vendosi të mos luante. Gjykimi i qytetarëve erdhi i qartë: elektorati me 5 yje kërkonte të ulej në tavolinat vendimarrëse, dhe jo vetëm të denonconte dhe të zhbironte vendimet e marra nga dikush tjetër.

Së dyti imazhi që po krijohet rishtazi brenda Lëvizjes nuk është aspak qetësues. Pak ditë më parë senatorja Adele Gambaro fajësoi tonin agresiv të diskursit politik të Grillos për humbjen në zgjedhjet lokale. Dukej një kritikë normale drejt liderit por menjëherë shkaktoi një breshëri reagimesh deri në kërkimin për dorëheqje nga grupi parlamentar. Por Gambaro nuk pranoi të largohej “vullnetarisht”, kështu që të hënën e ardhshme grupi do votojë për përjashtimin e saj. Kjo praktikë mban një erë të rëndë monarkie ku devijimi nga “linja e partisë” mund të sjelli pasoja fatale. Aktualisht Lëvizja ngjan si një fuçi baruti gati për të shpërthyer, e ndarë në rryma dhe rrëkera në bazë të “ortodoksisë” ndaj linjës.

Shumë shpresa lindën kur 5 Yjet u ngjitën me aq vrull në qiellin politik italian. Një rezultat aq premutes (26%) që në tentativën e parë rrallë kishte ndodhur në historinë demokratike të shtetit. Është një mëkat nëse Lëvizja nuk shikon më larg se hunda e vet duke u kacafytur brenda llojit vetëm për një llaf goje. Shkëlqimi i yjeve të Grillos ishte sinqerisht verbues por tanimë drita po bëhet gjithmonë më e zbehtë dhe yjet po bien pak e nga pak. E.Xhanari