Shënim: PS-ja u rrit kryesisht në thellësi; LSI-ja kryesisht në gjerësi

Në rang vendi, PS-ja mori rreth 93 mijë vota më shumë se në vitin 2009, duke patur një rritje rreth 15%. Ndërkohë, rritja e totalit të votave të vlefshme ishte rreth 13%. Kjo tablo e nivelit kombëtar të PS-së na lë të kuptojmë se rritja e saj, në vija të trasha, ka ardhur nga marrja e votave të zgjedhësve të saj të 2009-ës; të fëmijëve të tyre që kishin mbushur moshën për votim deri në 23 qershor; dhe një pjese të konsiderueshme të emigrantëve që s’kanë marrë pjesë në zgjedhjet e 2009-ës, por votuan në 23 qershor. Pra mund të thuhet se, në rang kombëtar, PS-ja është rritur kryesisht në thellësi, duke e bërë më të thellë përkrahjen në brezat demografikë të votuesve.

Nga ana tjetër, LSI-ja duket se është rritur kryesisht në gjerësi. Ajo mori rreth 106 mijë vota më shumë se në vitin 2009, duke patur një rritje rreth 150%.  Ndërkohë, rritja e totalit të votave të vlefshme ishte rreth 13%. Kjo tablo e nivelit kombëtar të LSI-së na lë të kuptojmë se rritja e saj, në vija të trasha, ka ardhur nga marrja e votave të zgjedhësve të saj të 2009-ës; të fëmijëve të tyre që kishin mbushur moshën për votim deri në 23 qershor; dhe një pjese jo të pakonsiderueshme të votuesve potencialë të djathtë.

Analizimi i përthyerjeve gjeografike e demografike të kësaj tabloje të përgjithshme kërkon një studim rigoroz me anketime të shumta në terren, i cili nuk mund të zëvendësohet me hamendje të bëra në kafenetë e Tiranës…

Fusnotë: Parashikimi se pakti i 1 prillit mes Rames dhe Metës do te prodhonte sinergji negative per PS-ne, bere nga K.Islami dhe A.Hoxha, si dhe nga kritike zëlartë të majtë, nuk u materializua, sepse PS-ja u rrit edhe ne numer absolut votash edhe si perqindje ndaj totalit të votave të vlefshme. 

E.Zaloshnja