Shënim: Nimet Musaj, "Agron Duka" i qarkut Fier?

Biznesmeni Agron Duka kandidoi për herë të parë për një vend në Kuvendin e Shqipërisë në vitin 2001. Ai u kandidua nga PS-ja për të përfaqësuar zonën e Shijakut, e cila kishte votuar rregullisht për PD-në pothuaj në masën 80%, dhe fitoi. Pas 4 vjetësh ai humbi në këtë zonë, por me një barazim statistikor pothuaj 50-50. Pra ka demonstruar se ka një përkrahje personale në atë zonë. Pasi PS-ja nuk e kandidoi dy herë rradhazi (në 2009-ën dhe tani) Duka ka kandiduar për PR-në, duke ia pakësuar kështu gjasat koalicionit të majtë për të shtuar një mandat në qarkun e Durrësit, falë përkrahjes së tij personale në zonënë e Shijakut.

Në mënyrë të ngjashme, biznesmeni çam Nimet Musaj, kandidoi para 4 vjetësh në qarkun e Fierit nën siglën e PDIU-së. Ai mori rreth 4700 vota si pjesë e koalicionit të djathtë, duke qenë fare pranë marrjes së mandatit. Aktualisht ai është kandiduar nga Aleanca Popullore, e cila është pjesë e koalicionit të majtë. Pra, ai është i vetmi kandidat në atë qark i cili ka marrë një sasi të konsiderueshme votash si pjesë e koalicionit të djathtë dhe që ka kaluar në koalicionin e majtë. Duke ia ulur kështu gjasat koalicionit të djathtë që të shtojë një mandat në qarkun e Fierit.

Në një intervistë të shkurtër telefonike që i bëra Musajt, më tha: “Kam dy zhgënjime të mëdha nga PDIU-ja dhe PD-ja. Së pari, kryetari i PDIU-së e përdori kauzën çame për përfitime personale të tijat dhe të njerzve të vet, dhe sot kandidon në listën e sigurtë të PD-së. Së dyti, numëruesit e PD-së më vodhën votat në 2009-ën, sepse unë kisha 5700 vota dhe jo 4700 që më zyrtarizuan ata. Kam bindjen se këtë rradhë, duke patur vëzhguesit tanë në numërim, votat e atyre që më votuan e do të më votojnë përsëri nuk do të numërohen më për një parti tjetër”.
E.Zaloshnja