Shënim: Në PD (pothuaj) nuk pipëtin asgjë, ashtu si para 23 qershorit

Rënia e Berishës ka riaktivizuar personazhe “të arkivuar” të PD-së, të cilët po kërkojnë ta thonë të tyren në këtë moment. Tre syresh i kish bërë tok Anila Basha në programin e vet “Airport” të televizionit A1 Report. Është fjala për Rexhep Ukën, Myftar Gjanën dhe Afrim Krasniqin (ky i fundit flet, në fakt, si komentator politik).

Duket se fakti që Berisha është ende në komandë të gjërave i bën të gjithë demokratët e ish demokratët (me pak përjashtime) të mos i largohen shumë mentalitetit mainstream në PD. Ata bëjnë një numër kritikash, por bëjnë kritika të rrumbullakosura, pa folur për fajtorë. Fjala vjen, thonë që është shkelur statuti, që po shkelet sërish statuti, që drejtimi ka qenë autokratik, që kryetari Berisha le ta drejtojë procesin dhe garën, por ta bëjë këtë në mënyrë demokratike, që Olldashi e Basha janë ok, por më shumë rëndësi kanë procedurat, që interesi i madh është të shëndoshet PD-ja (këtë të fundit e ka thënë Eduard Selami në një shënim në facebook), etj, etj.

Siç shihet, të gjithë demokratët e ish demokratët janë të ndrojtur e skrupulozë edhe pas një disfate si kjo që ndodhi. Për ta duket sikur 23 qershori nuk ka mbërritur akoma.

Re.Pu.