Saimir Tahiri në “Top Story”: Ndërhyrja në Lazarat, jo ushtarake se nuk mund të ketë luftë. Deri në shtator merr fund situata që kemi gjetur

Ministri i Brendshëm Saimir Tahiri ka vënë një bast publik mbrëmjen e sotme duke deklaruar se problematika e kultivimit dhe e trafikimit të lëndëve narkotike, siç ka ndodhur këto vite, do të marrë fund brenda muajit shtator të këtij viti. Në emisionin “Top Story” të Sokol Ballës, ministri Tahiri tha se “në shtator, në Lazarat dhe në mbarë vendin, nuk do të kemi situatën që kemi gjetur”.

“Nuk do të ndodhë më ajo që ka ndodhur dhe do të shfrytëzohet çdo mjet, instrument i shtetit shqiptar. Policia patjetër, media, shoqëria etj” tha Tahiri. Duke iu referuar Lazaratit, ministri tha se ndërhyrja do të jetë komplekse dhe e gjithanshme, por që përjashton opsionin e ndërhyrjes përmes aksioneve ushtarake. “Kemi një plan së bashku me Prokurorinë, SHISH. Kemi një bazë të dhënash të mirë për të garantuar që në të gjitha rastet ndërhyrja në Lazarat të jetë efektive. Ndërhyrja nuk do të jetë luftë, do ketë elementë force. Zgjidhja për Lazaratin na takon të gjithëve. Shtatori  nuk do gjejë Shqipërinë me situatën që gjetëm sa i përket trafikut dhe mbjelljes së lëndëve narkotike” tha Tahiri.

k.k