Rama në “Opinion”: S’ka patur asnjë komplot ndaj Doshit, ia kemi thënë disa herë. Në parlament u duk se kush ishte i interesuar për këtë farsë

Kryeministri Rama ka deklaruar në emisionin “Opinion” se akuzat e Tom Doshit për një vrasje të porositur nga kryetari i kuvendit, Ilir Meta janë një farsë që drejtësia duhet ta zbardhë  se kush e ka organizuar. Sipas tij që në krye të herës për policinË që ka ndjekur çështjen, nuk ka pasur asnjë përpjekje për të eliminuar Tom Doshi dhe kjo i është thënë disa herë deputetit. “Pretendimin për organizimin e vrasjes e kam mësuar nga vetë deputeti, i cili më shprehu shqetësimin se ishte në dijeni të një komploti ku përfshiheshin personat që dihet se kush janë. Më ka vënë në dijeni dhe pastaj e kemi ndjekur çështjen bashkë me ministrin e Brendshëm. Unë kam diskutuar edhe me Prokurorin e Përgjithshëm sapo jam vënë në dijeni. Bëhet fjalë për një farsë që duhet hetuar deri në fund në mënyrë që të gjithë të marrin përgjegjësitë dhe opinioni të çlirohet nga makthi”-ka theksuar Rama.

 Rama tha se hetimet po zhvillohet në kohën e duhur, pasi deri para se të shpërthente një akuzë konkrete nuk kishte asnjë kallëzim nga Doshi dhe asnjë deponim nga i penduari. Ai u shpreh se në parlament u duk qartë se kush do ishin të interesuar për këtë farsë, që ka rezultuar në marrjen peng të opinionit publik dhe parlamentit. Rama nënvizoi se përjashtimi i Doshit nuk ka asnjë lidhje me akuzat e tij për vrasje, por sepse Doshi i shpalli luftë kryeministrit. Rama nuk ka preferuar të komentojë deklaratat e deputetit Ben Blushi se çarja mes Doshit dhe kryeministrit është histori e dy shokëve të ngushtë që janë prishur për arsye personale.

l.m