"Paralele” me Shqipërinë/Protesta në Kosovë; bëhet thirrje të mos paguhet energjia elektrike, sepse është shumë e shtrenjtë

Në Kosovë po protestohet për çmimin e energjisë elektrike. Protestën e organizon Klubi Politik i Studentëve dhe përmes saj apelohet për dy çështje: së pari bëhet thirrje që të mos paguhet energjia elektrike, sepse ka çmimin më të shtrenjtë në rajon, si dhe kthimi i tarifës së lirë në orarin ditor. Së dyti kërkohet transparencë për pronarin e ri të operatorit të shpërndarjes(http://koha.net/?id=27&l=40468). Kapet menjëherë ngjashmëria e problematikës me Shqipërinë, një vend ku çmimi i energjisë pranohet me konsensus se ka ndryshuar, por nuk dihet ende nëse është rritur, apo është ulur, mesatarizuar, a normalizuar. Edhe këtu çështja e operatorit të shpërndarjes ka mungesë transparence, në kuptimin, që një palë thotë se u shtetëzua për të filluar reformën, kurse nga pala tjetër deklarohet se u bë kjo që u bë, se qeveria pagoi një alamet gjobe ndaj CEZ-it. Kush e di si është e vërteta! Pala e tretë, ata që paguajnë, vetëm këtë dinë me siguri: që paguajnë.
Në fund mund të nënvizohet një aspekt që shtrohet në nivel politik: qeveria këtë fillim viti prezantoi planin e ri të partneritetit publik-privat, duke njoftuar se do të jepen me koncesion edhe shërbime mjekësore, ndër të tjera. Përveçse bie ndesh me premtimet e fushatës, kjo e koncesioneve vjen përballë me shtetëzimin e OSHEE-së, si praktikë për arritjen e suksesit. Edhe pse ne nuk e dimë me siguri që nesër OSHEE-ja, kur të ketë mbledhur të gjitha detyrimet, mund të riprivatizohet.
s.z