Noka: Nalton Jacaj u kap me 200 kg heroinë, Rama i beson Drejtorinë e Lojërave të Fatit

Deputetit i Partisë Demokratike, Flamur Noka ka deklaruar se njerëz të përfshirë në trafik ndërkombëtar droge, janë më të preferuarit për vendet dhe postet kyçe në administrate. Me këtë deklaratë ka dalë sot nga selia e PD ish-Ministri i Brendshëm, Flamur Noka. Ai ka akuzuar kryeministrin Rama për inkriminim të administratës.

"Inkriminimi që Edi Rama i ka bërë administratës ka shkuar sipas një skeme gjakftohtë dhe ka synuar kapjen e sektorëve kyç. Personat e përfshirë në trafik ndërkombëtar droge, janë më të preferuarit. Me Edi Ramën, menjëherë pas ardhjes në pushtet, rilindi Nalton Jacaj, i kapur në Turqi me 200 kilogramë heroinë, të cilit iu besua një rol aktiv tek Drejtoria e Lojërave të Fatit.”, ka thënë Noka.

Më tej ai ka bërë një përshkrim të së shkuarës së Nalton Jacaj duke servirur për mediat edhe disa lajme të printuara të viteve më parë ku policia e Stambollit kishte kapur dhe arrestuar Jacaj për trafik lëndësh narkotike. Sipas PD-së e vërteta është se vendet në administratë janë zënë, dhe postet kyçe janë rezervuar për trafikantët e drogës. S.S