Njohja e Kosovës nga Sllovakia, Lajçak: Qeveria ka vullnet, por duhet ndryshuar rezoluta e parlamentit

Sllovakia është një nga vendet që nuk e ka njohur ende pavarësinë e Kosovës dhe për të ndryshuar këtë qëndrim duhet rrëzuar rezoluta që parlamenti slloven ka miratuar për këtë çështje. Ministri i Jashtëm sllovak, Miroslav Lajçak është shprehur gjatë konferencës së përbashkët me ministrin Bushati se qeveria sllovake nuk mund të dalë mbi vendimin e parlamentit.

“Ne jemi një demokraci parlamentare dhe siç e dini dhe ju, në një vend të tillë qeveria varet nga vendimet që merr Parlamenti. Qëndrimi ynë zyrtar për sa i përket Kosovës, varet nga rezoluta që ka miratuar parlamenti ynë. Pra duhet që parlamenti të ndryshojë qëndrimin e vet, por kjo nuk do të thotë që qeveria jonë po rri duarkryq pa bërë asgjë. Qëndrimi ynë kombëtar për sa i përket Kosovës nuk është armiqësor, përkundrazi. Bashkëpunimi ynë me Kosovën është shumë më thelbësor dhe aktiv se sa bashkëpunimi që mund të kenë me Kosovën vende që e kanë njohur atë formalisht. Ne kemi një mision në Prishtinë, ne njohim dokumentet zyrtarë të Kosovës, ne kemi një dialog aktiv dhe japim asistencë zhvillimi në Kosovë, kemi ekspertë që kanë ardhur nga Kosova në Sllovaki, pra me fjalë të tjera kemi një bashkëpunim vërtet të qenësishëm. Mbështetja jonë për integrimin evropian të Ballkanit perëndimor përfshin gjithashtu edhe Kosovën dhe ne e kemi bërë shumë të qartë këtë qëndrim tonin”-ka deklaruar Lajçak.

l.m