Një shqiptar në Zvicër kërcënon me bombë, ngaqë “gjinekologu i ka parë gruan lakuriq gjatë vizitës në spital”!!!

Një shqiptar më origjinë nga Kosova është bërë personazh lajmi në kantonin e Zyrihut, Zvicër. Dhe e ka bërë në mënyrën e tij. Kish shtruar të shoqen në një spital gjinekologjik. Më saktë, e kish çuar për një kontroll. Dhe aty, doktoresha kish mbajtur pranë vetes dhe një asistent, mashkull. Shqiptari ka demonstruar shenja nervozizmi gjatë vizitës, dhe kuptohet, e gjitha ka ndodhur prej pranisë së burrit, teksa gruaja e tij ishte e zhveshur për t’u egzaminuar. Por ai nuk kish bëzajtur gjatë kontrollit.

Është bërë i gjallë dy ditë më pas. Ka marrë në telefon doktoreshën, që kish bërë vizitën, dhe i kish thënë se “prania e burrit gjatë kohës që gruaja e tij ishte lakuriq ishte skandaloze”. Ai, sipas gazetës Express, kish bërë me dije doktoreshën se kish marrë adresën e saj private, dhe ajo do duhej të ruhej tani e tutje. Madje, ai kish paralajmëruar kërcënueshëm se do të bombardonte spitalin kantonal të Winterthurit. Këtë version e mbron dhe siti zviceran në gjuhën gjermane www.tagesazeiger.ch. Pas kësaj, shqiptari është arrestuar, dhe është çuar para gjyqtarëve, ku ai është mbrojtur duke thënë se “mjekja më ka shkatërruar jetën, pasi ka lejuar një burrë të shohë gruan time lakuriq”. Qysh prej atij momenti, ai ndodhet në një gjendje depresive, dhe marrëdhënia me të shoqen po i prishet. Gjyqtarja i ka thënë se “mjeku ka qenë atje si asistent, për të mësuar profesionin”, dhe përgjigja ka qenë: “Cili është ai që e lë gruan e tij vullnetarisht që të tjerët të mësojnë mbi trupin e saj lakuriq?” Nuk dihet ç’i ka thënë gjyqtarja, por me siguri ka menduar si përgjigje: të gjithë zviceranët e lënë.

Emri i shqiptarit nuk jepet as nga siti zviceran,a s nga gazeta Express.

Re.Pu.