New York Times: Kina dhe Rusia po ndërtojnë një aleancë anti amerikane

Dy autorë, Leslie H. Gelb dhe Dimitri K. Simes, kanë shkruar një artikull për gazetën New Times, në të cilin evidentojnë një riafrim “me synime anti amerikane” të Rusisë e të Kinës. Ngjarja më e freskët që e ilustron këtë qasje është kjo që ka të bëjë me Eduard Snowden-in, njeriun që nxorri në shesh skandalin diplomatik të përgjimit nga ana e amerikanëve të aleatëve të tyre, e të shtetarëve të tjerë nëpër botë. Rusia e Kina kanë bashkëpunuar, ndonëse me shumë kujdes, me synimin që Snowden-i të mos bjerë në duart e drejtësisë së SHBA-ve, ku dhe opinioni publik është me idenë se Snowden-i ka gabuar me atë që ka bërë, dhe duhet dënuar.

Para kësaj, thonë autorët, ishte (dhe është akoma) ngjarja e Sirisë. Kina e Rusia kanë penguar në Këshillin e Sigurimit të OKB-së marrjen e vendimit për ndërhyrje në Siri. Ndërkohë, Washingtoni është shqetësuar edhe nga hacker-imi i kompanive amerikane në Kinë, apo cyber-sulmet e Rusisë mbi fqinjët e saj. Lidhur me politikën ndaj Iranit që tenton të prodhojë armë bërthamore, Rusia e Kina nuk kanë demonstruar se kanë dallime të mëdha me SHBA-të, por nuk shkojnë, sidoqoftë, deri tek qëndrimi amerikan. Xi Jinping-u, me t’u zgjedhur President i Kinës dy muaj më parë, vizitën e parë jashtë vendit e bëri … në Moskë, për t’u takuar me Putinin. Në fund, ka dalë lajmi që Rusia e Kina do të bëjnë një stërvitje detare të përbashkët, që ëhstë më e madhja që ato dy vende kanë bërë ndonjëherë.

Shkrimi ka dhe interpretime të këtij zhvillimi, dhe ata që dinë anglisht mund ta ndjekin të plotë në linkun http://www.nytimes.com/2013/07/07/opinion/sunday/a-new-anti-american-axis.html?hp

Re.Pu.