Në Tiranë kam dëgjuar të thonë: "Ai nuk është shqiptar, është kosovar”

Blerta Zeqiri është një regjisore nga Prishtina. Është regjisorja e filmit “Kthimi”, i cili është shpallur filmi më i mirë ndërkombëtar në Festivalin e Filmit në Sundance (ky festival mbahet çdo vit në Utah, është themeluar nga aktori i famshëm amerikan Robert Redford dhe njihet si festivali më i madh i filmit të pavarur në SHBA).

“Kthimi” i Blertës (është nominuar edhe për European Film Award - një lloj Oscari evropian) rrëfen një histori të pasluftës dhe ka në qendër një burrë, i cili kthehet tek gruaja dhe djali nga burgu i Serbisë, por ndjen që shumë gjëra kanë ndryshuar prej momentit që ai është shpallur i zhdukur.
Regjisorja 33-vjeçare, e cila është edhe anëtare e Akademisë Europiane të Filmit, ka folur për vete dhe për “Kthimin” në një intervistë në faqet e fundjavës në të përditshmen “Shekulli” dhe aty mes të tjerash është pyetur për ndjesitë e saj kur viziton Tiranën.

Thotë Blerta: “...Sa herë që e kam vizituar Tiranën kam kaluar shumë mirë. Më pëlqen klima, restorantet, kafeteritë. Më pëlqen t’i shikoj kalimtarët, gratë e vjetra nëpër qytet, tregjet e vogla të pemëve dhe perimeve... E vetmja gjë që nuk më pëlqen është trafiku i veturave. Kam frikë shumë të kaloj rrugën, sepse më duket se veturat vijnë nga çdo anë dhe shoferët i ngasin ato goxha shpejt, kurse burinë duket se e përdorin në vend të frenave...”.

Dhe më pas, kur pyetet si e sheh si artiste dhe si intelektuale raportin "shqiptar i Shqipërisë-shqiptar i Kosovës?, - regjisorja e re kosovare, thotë:
“...Në esencë për mua nuk ka dallim më shumë se sa Prizrenasi me Gjakovarin, apo Sarandasi me Shkodranin. Në Tiranë kam dëgjuar të thonë: ”Ai nuk është shqiptar, është kosovar”. Mua kjo gjithnjë më tingëllon si gabim dhe më duhen disa sekonda për të kuptuar se realisht kanë të drejtë sepse flitet për shtetësi e jo për kombësi. Në këto momente e vërej ndarjen reale që e kemi, të cilën gjithmonë provoj ta shoh si ndarje simbolike...”
A.N.

Në foto: Zeqiri (e treta majtas) me bashkëpunëtorët e saj të filmit “Kthimi”