Në Shqipëri qarkullojnë 3 mijë autobusë si ai i tragjedisë me moshë mesatare 14 vjet

Kanë kaluar dy ditë nga aksidenti i Himarës për një bilanc të njohur tashmë për të gjithë, ndërsa solidarizimi fillestar për të ndihmuar fatkeqët i ka lenë vendin analizimit të shkaqeve që çuan në një ngjarje të tillë. Fillimisht u fol për një atak kardiak të shoferit por kjo u hodh poshtë dje nga mjekët pas kryerjes së autopsisë. Dy versionet e tjera janë gabimi njerëzor dhe ndonjë avari e mjetit duke rikthyer vëmendjen tek siguria e mjeteve që qarkullojnë në rrugët shqiptare.

Në lidhje me këtë, nga të dhënat e Drejtorisë së Shërbimit të Transportit Rrugor të publikuara sot në “Shqip”, mësohet se në të gjithë vendin qarkullojnë rreth 3 mijë autobusë të ngjashëm me atë të aksidentit. Mosha mesatare e tyre është diku tek 14 vjet, kurse mjeti i tragjedisë kishte 24 vjet që përdorej.

Gazeta citon ekspertë të fushës të cilët shpjegojnë se mosha e autobusëve që qarkullojnë në Shqipëri është relativisht e lartë por se këto mjete janë të parashikuara që të shfrytëzohen deri në 30 vjet, sigurisht nëse mirëmbahen dhe kryejnë kontrollet teknike sipas përcaktimeve ligjore.

Re.Pu.