Në kufijtë e Europës - nga do të shkojë Ukraina?

Rusia duket se nuk do të rrijë duarlidhur përballë situatës në Ukrainë. Presidenti rus Vladimir Putin ka bërë një vlerësim shumë të ashpër mbi protestat antiqeveritare që po zhvillohen së fundmi në këtë vend. Sipas tij, lëvizjet e fundit janë një përpjekje e organizuar nga Perëndimi për të rrëzuar qeverinë legjitime. Më tej akoma, ai e ka cilësuar opozitën ukrainase si një mbulim të mundshëm për terroristët. (http://rbth.co.uk/international/2013/12/04/putin_blames_external_forces_for_ukrainian_crisis_32255.html). Putin theksonte se organizimet e tanishme synojnë zgjedhjet presidenciale të vitit 2015 dhe kanë kohë që janë përgatitur. Ndërkohë “Zëri i Rusisë” bënte të ditur se forcat e Ministrisë së Brendshme ukrainase kanë lëvizur këto ditë nga Krimea drejt Kievit, në përpjekje për të forcuar masat ndaj protestuesve. Ukraina është porta evropiane e Rusisë dhe kjo nuk është hera e parë që forcat filoperëndimore me ato filoruse ndeshen në këtë vend. E reja është se kundërshtimi i Moskës për ndërhyrje të huaj në Ukrainë vjen pas suksesit të saj në krizën siriane, që dëshmoi se ndihmat ndaj regjimeve të ndryshme mund të rezultojnë efikase në përballimin e presioneve ndërkombëtare.

s.z