"Mustafa" merr vendim për amendamentet e Gjykatës Speciale. Jahjaga përshëndet vendimin e Qeverisë

Qeveria e Kosovës, në mbledhjen e mbajtur sot ka marrë vendim që t’i dërgojë në Kryesinë e Kuvendit të Kosovës dy amendamentet kushtetuese që i hapin rrugë themelimit të Gjykatës Speciale për Kosovën. ​Vendimi është marrë me shumicë votash. Kreu i ekzekutivit, Isa Mustafa, ka thënë se qeveria që drejton nuke ka të lehtë të marrë vendime të tilla, megjithëse ka thënë se edhe deputetët duhet të jenë ata që duhet votuar për të kryer këtë obligim ndërkombëtar. Mustafa është shprehur i bindur në pastërtinë e luftës së UÇK-së. Opozita ka kundërshtuar krijimin e Gjykatës Speciale, duke u deklaruar se do të votojë kundër saj.

Ndërkohë presidentja e Kosovës, Atifete Jahjaga, mbështet vendimin e Qeverise për të proceduar amendamentet kushtetuese që kanë të bëjnë me Gjykatën Speciale. Përmes një deklarate për shtyp lëshuar nga zyra e Presidentes, thuhet se ky është hapi i parë drejt realizimit të obligimit të Republikës së Kosovës që del nga marrëveshja ndërkombëtare e votuar me 2/3 e votave të deputetëve.