Meta pas takimit me Ramën: LSI do t’i qëndrojë deri në fund marrëveshjes me PD-në

Pas takimit me Edi Ramën sot në Hotel Sheraton, kur u pyet në lidhje me jetëgjatësinë e koalicionit të LSI-së me Partinë Demokratike, Meta deklaroi se "LSI-ja do t’i qëndrojë marrëveshjes me PD-në deri në fund, pasi ka treguar se është një forcë që i qëndron marrëveshjeve deri në fund." Kjo deklaratë mund të interpretohet në dy mënyra: 1 – Marrëveshja ka funksionuar deri më sot dhe LSI-ja do t’i qëndrojë asaj deri në fund; 2 – LSI-ja do t’i qëndrojë marrëveshjes deri në fund, për aq kohë sa PD-ja t’i përmbahet asaj.

Që t’ë kuptojmë se cili interpretim është më i saktë duhet të kthehemi prapa në kohë, kur Meta nënshkroi marrëveshjen e bashkëqeverisjes me Berishën për periudhën 2009-2013. Duke e parë me kujdes atë marrëveshje, mund të konstatojmë lehtë se ajo bazohej në tre kushte të LSI-së: 1 – Punësimi i militantëve LSI-stë në 20% të administratës shtetërore; 2 – Korrektimi kombëtar i sistemit zgjedhor rajonal; 3 – Kandidimi për President të Republikës i një personi që do të ketë aprovimin e LSI-së.

Deri më sot, kushti i parë është realizuar plotësisht, pavarësisht kostos që mund të ketë patur tek militantët demokratë zëvendësimi i tyre prej LSI-stëve. Për kushtin e dytë, LSI-ja ka filluar ta ngrejë zërin kohët e fundit, por duket se këtë gjë e bën më shumë për diversion se sa për ta kushtëzuar qëndrimin në koalicion me “kauzën” që e futi në grevë urie në vitin 2008. Ndryshe qëndron puna me kandidatin për President të Republikës.

Meta duket se synon një kandidat të tij për President dhe pikërisht këtu i ka ngecur sharra në gozhdë me Berishën, i cili ka këmbëngulur publikisht që kandidati për President do të jetë një nga drejtuesit e lartë të PD-së. Dhe kjo divergjencë mes Metës e Berishës mund të bëhet shkaku për prishjen e marrëveshjes mes PD-së dhe LSI-së për bashkëqeverisje 4-vjeçare…

E.Zaloshnja