Më së fundi, një mesazh me këmbë në tokë në lidhje me punësimin: Arsimi profesional, një mënyrë e sigurt për të gjetur punë

Arsimi profesional është ilaçi i duhur kundër papunësisë së të rinjve. Me këto fjalë iu drejtua sot Ministri i Mirëqenies Sociale dhe Rinisë, z. Erion Veliaj, nxënësve të Shkollës së Mesme Profesionale “Beqir Çela” dhe studentëve të Fakultetit të Studimeve të Integruara me Praktikën (FASTIP) në Durrës. Në vizitën e tij në dy institucionet arsimore, z. Veliaj vuri në dukje se Ministria do të inkurajojë të rinjtë shqiptarë se shkollat profesionale janë një mënyrë e garantuar për të gjetur punë nesër, për arsye se një zanat të jep më shumë mundësi për t’u punësuar.

“Prindërve shqiptarë që kanë sjellë fëmijët e tyre në një shkollë si “Beqir Çela” apo FASTIP dua t’u them se kanë bërë zgjedhjen e duhur. Kjo është e vetmja mënyrë që fëmijët e tyre të marrin një zanat me të cilin të fitojnë para, jo vetëm për t’u ushqyer e jetuar, por edhe për të fituar dinjitet”, u shpreh z. Veliaj. Ai vuri në dukje se duke filluar nga viti tjetër, qeveria shqiptare do të shpenzojë më shumë për shkollat profesionale se sa për shkollat e arsimit të përgjithshëm, në mënyrë që të nxisë pjesëmarrjen në to.

“Një nga arsyet pse Zvicra, Austria apo Gjermania nuk u prekën nga kriza financiare ishte investimi që kanë bërë me arsimin profesional”, shtoi ai. Sipas z. Veliaj, suksesi i shkollave të tilla si “Beqir Çela” apo FASTIP duhet promovuar në mënyrë që shembulli i tyre të ndiqet edhe në qytete të tjera të Shqipërisë. “Duhet ta heqim mendimin e gabuar se arsimi profesional është për nxënësit e dobët. Përkundrazi, të mësosh një zanat është një zgjedhje më shumë për të qenë i dobishëm në shoqëri”, tha ai.

Drejtori i shkollës së mesme profesionale “Beqir Çela”, z. Bashkim Shkëmbi, tha se frekuentimi i shkollës ka ardhur duke u rritur nga viti në vit. “Shkollat profesionale janë shkollat e jetës”, u shpreh ai. Shkolla “Beqir Çela” është rikonstruktuar në vitin 1993 me ndihmën e qeverisë zviceriane, e cila dha kontributin e saj edhe në krijimin e strukturës mësimore dhe bazës materiale. Aty përgatiten punëtorë të kualifikuar dhe specialistë të mesëm dhe sot numëron rreth 1300 nxënës.

Ndërsa Fakulteti i Studimeve të Integruara me Praktikën (FASTIP) është shkollë e lartë profesionale, e cila operon me modelin “dual” që konsiston në dy shtylla kryesore: përgatitje akademike në auditoret dhe trajnim praktik në sipërmarrje. Studenti pajiset me diplomën “Bachelor Degree” dhe me së paku, 3 vite përvojë pune. Studenti që punësohet në kompanitë ku ka zhvilluar praktikat, përveç tre viteve përvojë ka edhe njohjen në detaje të punës manaxheriale që kërkon kompania në fjalë.

Re.Pu.