Kryetari i PD-së, akuzon se “kupola po manipulon provat”, por kërkon vetëm një dorëheqje

Kryetari i PD-së, Lulzim Basha, ka përsëritur pas seancës plenare, kërkesën për dorëheqje të kreut të Kuvendit, Ilir Meta. Basha ka deklaruar, njësoj si Berisha para tij, se në pozicionin ku ndodhet, askush nuk mund ta hetojë Metën. Shembull është ai që Basha e quajti rrjedhje të informacionit nga dëshmia e Durim Bamit në Prokurori. “ Janë ata, Rama dhe Meta autorët e filtrimit në media të informacioneve nga marrja në pyetje e Durim Bamit për këtë çështje. Informacione të tilla, në çfarëdo rrethane, në shtetin ligjor, janë pjesë e sekretit të hetimit, vërtetësia apo sajimi i të cilave mund të konfirmohen sipas ligjit vetëm nga organet e drejtësisë dhe në aulën e drejtësisë. Kjo rrjedhje informacioni, që nuk mund të dihet për momentin a është i vërtetë apo i fabrikuar, është organizuar për të bërë presion dhe për të orientuar hetimin në hullinë që dëshiron kupola nën akuzë”, tha Basha. Në parantezë duhet nënvizuar se kërkesa e opozitës është e qëndrueshme, pra kërkesa për dorëheqje të Metës ka një bazë logjike dhe morale, mirëpo argumenti se kjo kërkohet pse Meta manipulon nga detyra ku është çalon. Vetë Basha përfshin në këtë akuzë edhe kryeministrin, të cilit nuk po i kërkohet dorëheqja, ndonëse akuzohet se është pjesë e manipulimit të provave.
s.z