Ironia e një shembjeje: Kompleksi “Jon”

Kryetari i Bashkisë Vlorë, Shpëtim Gjika, i ka kërkuar dje INUK-ut që të shembë Kompleksin “Jon” në zonën e Ujit të Ftohtë. Po dje, Kryetari i Task Forcës për Kontrollin e Territorit, Saimir Tahiri, ka dërguar një kallzim penal në prokurori, ku ndër të tjera, ka akuzuar Bashkinë e Vlorës, të kryesuar nga Shpëtim Gjika, për  dhënien e lejes së ndërtimit të  Kompleksit “Jon” në shkelje të plotë të ligjeve në fuqi. Dhe po dje, Këshilli i Ministrave, i cili ka emëruar Saimir Tahirin si Kryetar të Task Forcës për Kontrollin e Territorit, akordoi rreth 5 milion dollarë për pronarët e Kompleksit “Jon” nga fondi i emergjencës, për t’i dëmshpërblyer deri në fund të këtij muaji për prishjen e pronës. Gjysma e këtij kompleksi është ende në pronësi të dy investitorëve të tij, të cilët akuzohen për shkelje të ligjeve nga anëtari i Këshillit të Ministrave dhe Kryetari i Task Forcës për Kontrollin e Territorit, Saimir Tahiri.

Shënim: Po dje, Kryetari i Këshillit të Ministrave, Edi Rama, deklaroi se nuk ka asnjë lek në arkën e shtetit për të paguar pensionet e papaguara të invalidëve për muajt shtator-nëntor…

E.Zaloshnja