Ikja nga Kosova, problem në rritje. Politika bën thirrje: “Mos ikni! Të mbahemi si në ditët e vështira!”

Mediat në Kosovë kanë disa kohë tashmë që raportojnë dukurinë e ikjes në masë të qytetarëve. Ikje nga varfëria, nga dështimi i shtetit për të siguruar një minimum shprese, ikje diku me shpresën se kudo ku është kjo Diku, është më mirë se në vendin tënd. Për këtë dukuri që po kthehet në një thuajse epidemi, prononcohen edhe politikanë, të cilët duhet thënë se kanë një mesazh korrekt: Mos ikni! Kështu shprehet edhe Ramush Haradinaj. “Është e hidhur kur pas disa dekadave sakrificë e mund, nuk e shohim vendin ashtu siç e deshëm. Rinia na bredhë rrugëve, pa punë e perspektivë, intelektualët pa shpresë se një ditë do të japin kontributin e tyre për vendin, gjyshet e gjyshërit tanë pa pleqëri të dinjitetshme. Me të gjitha që më shkruani pajtoj. Por nuk pajtoj se duhet të ikim nga Kosova. Të mbahemi, si në ditët më të vështira, të bashkohemi në punë, se vetëm kështu do të vijnë ditët e mira”, shkruan Haradinaj. Vetëm këto dy ditë është raportuar se nga Gjermania vijojnë shqetësimet pëe azilkërkuesit shqiptarë. Madje lamdi i Bavarisë ka kërkuar që edhe Shqipëria të njihet si shtet i sigurtë, në mënyrë që të mos trajtohet më asnjë kërkesë për azil. Në Shqipëri nuk ka ndonjë thirrje “mos ikni”, por ekonomia është ajo që duket se shtyn njerëzit drejt opsionit “të një jete më të mirë”.
s.z