Idrizi apel Panaritit: Merr një çam me vete në Athinë; dhe ngrije e mbroje çështjen çame në bisedat me grekët

“Janë mbi 40 mijë shqiptarë të dëbuar nga Çamëria, dhe 5 mijë të vrarë” – kështu e përmbledh në terma arithmetikë Shpëtim Idrizi çështjen çame në një shkrim, që është publikuar në një numër të përditshmesh (Shqip, Panorama, Mapo, etj), me të cilin ai i paraprin vizitës së ministrit tonë të jashtëm në Athinë. “Ka tetë vjet që nuk bëhet një vizitë e tillë zyrtare”, thotë Idrizi, duke iu referuar “njohësve të këtyre marrëdhënieve”, dhe këtë pauzë 8 vjeçare e merr si shenjë të faktit që ka pasur probleme mes dy vendeve.

Idrizi citon një frazë të ish-ministrit të jashtëm grek, Karolos Papulias, që është thënë 20 vjet më parë, kur zyrtarët e politikanët shqiptarë (Meksi, Serreqi, vetë Berisha) nuk kanë vuajtur, sipas tij, prej kompleksit të varësisë prej Athinës, dhe e kanë ngritur këtë çështje në bisedat me palën greke. “Kjo çështe mund të trajtohet me qetësi pas 10 a 20 vitesh, ndërsa sot plagët janë ende të hapura”, thuhet të ketë thënë Papulias, për të cilin Idrizi nënvizon konsiderata pozitive. Ky citim i nxjerrë nga arkivat i shërben Idrizit pët ta përdorur si një apel për ta hapur qartë e fort këtë çështje në bisedat me homologun e tij, Avramopulos, i cili – në këtë pikë është përsëri hera e konsideratave pozitive për një zyrtar grek – “është dalluar gjithmonë për qëndrime miqësore e integruese ndaj shqiptarëve, edhe pse militon në kampin konservator.

Në shkrim ka edhe tone të tjera pajtuese e konstruktive. “Ne nuk duam që kjo çështje të zgjidhet sakaq. Ne e dimë që ajo nuk mund të zgjidhet menjëherë. Por ne duam gjeste të vërteta pajtimi”, thotë ai. E ndërkohë, kërkon nga Panariti që të marrë me vete në Athinë, si pjesë të delegacionit, edhe një përfaqësues të çështjes çame. Por janë të gjitha gjasat që kjo kërkesë e fundit të mos merret parasysh.

E.G.