Filip Çakuli ironizon garën për kryetar të PD-së dhe Berishën që vijon të flasë për arritjet e veta

Në fund të një shkrimi të Filip Çakulit, tregohet një anektodë:

“Një çift pleqsh, që do të festonin 50-vjetorin e martesës së tyre. Shkuan në të njëjtin hotel ku kishin shkuar për herë të parë, në të njëjtën dhomë.

-Është me të vërtetë shumë prekëse, thotë plaka e ekzaltuar, kjo që po përjetoj tani. Më duket vetja si në atë kohë, kur ishim të rinj. Ndjej një afsh përbrenda, aq sa gjoksi me digjet nga dashuria për ty…

-Lëri moj këto budallallëqe, ia kthen plaku, dhe hiqi cicat që të kanë rënë te pjata e nxehtë e supës…”

Këtë anektodë e tregon për të ironizuar protagonizmin e pasosshëm të Berishës nga pozitat e kryeministrit, në një kohë që shqiptarët e kanë trajtuar si qeverinë më të urryer të 22 viteve të fundit (gati 1 milion syresh votuan kundër). “Berisha, ndërkohë që gara [për postin e kryetarit të PD-së] vazhdon, është edhe kryetar partie, edhe kryeministër deri në orën e fundit, dhe po e përdor këtë periudhë jo për të reflektuar për humbjen, por për të shantazhuar fitimtarët. Në postimet e tij në Facebook edhe sot ai numëronte arritjet e qeverisë së tij, rrugët, kopshtet, çerdhe, shkollat, ujësjellësat, pjeshkët, arrorët, ullinjtë, fabrikat, uzinat etj”, shkruan Çakuli.

Artikullin ai e nis me garën mes Bashës e Olldashit, të cilët “po bëjnë një lojë luftash në pikë të vapës, [dhe po] ngulin këmbë se Sali Berisha nuk ka asnjë faj dhe përgjegjësi për humbjen e PD-së më 23 Qershor… Nëse Berisha nuk paskësh faj, atëherë pse duhej të largohej nga kryetarllëku njëzet e ca vjeçar? Nëse janë bashkëfajtore të tre, më mirë le të rrijë njëri prej fajtorëve, ai që ia ka marrë dhe dorën dhe e ka çuar partinë në këtë derexhe dhe s’ka pse të ndërrohen fajtorët në krye të një partie.”

Shkrimin e plotë, që është i natyrës satirike, mund ta ndiqni në linkun http://www.gazetatema.net/web/2013/07/10/tre-fajtore-pa-faj/

Re.Pu.