Fatos Tarifa i hedh Berishës një vështrim retrospektiv; dhe i rezulton që …

“Prognozë retrospektive, Berisha në historinë e së shkuarës”, e ka titulluar një shkrim të vetin Fatos Tarifa. Dhe e ka publikuar jo në Mapo, siç ka bërë zakonisht kohët e fundit, por në të përditshmen Dita. Ai është ngacmuar nga gara mes eksponentëve të PD-së dhe opinionistëve të shumtë për ta futur Berishën qysh tani në histori, dhe thotë: “nuk dua të bëj gabimin kaq shpesh të përsëritur në historinë e kombit tonë për t’i dhënë ‘vendin e merituar’ apo për të parashikuar fatin historik të z. Berisha ende pa u krijuar distanca e nevojshme në kohë për të gjykuar me ftohtësi dhe me objektivitet për figurën dhe rolin e tij”. Por më poshtë, vihet të bëjë “një ushtrim intelektual, ose logjik, duke iu referuar së shkuarës”. Dhe “guxon të parashtrojë katër hipoteza lidhur me modelin e liderit politik që përfaqëson z. Berisha, të cilat, edhe pse nuk mund t’i provoj dot, i konsideroj të vlefshme nga një perspektivë logjiko-historike”:

1. Sikur z. Berisha të kish hyrë në historinë politike të shqiptarëve fill para, gjatë, ose pas shpalljes së Pavarësisë së Shqipërisë, shembëlltyra politike e tij do të kish qenë Esad Pashë Toptani (jo Ismail Qemali apo Luigj Gurakuqi).

2. Sikur z. Berisha të kishte ardhur në pushtet në vitet 1920 ose 1930, ai, njëlloj si Ahmed Zogu, do të ishte vetëshpallur “mbret i shqiptarëve”. Dhe njëlloj si Toptani e Zogu, për të marrë pushtetin dhe për ta ruajtur atë, do t’u kishte falur shteteve fqinje më shumë se Shkodrën, Vermoshin, Shën Naumin dhe pjesë të hapësirës shqiptare në Detin Jon, dhe do të ishte sjelljë po njëlloj si ata ndaj kundërshtarëve të tij politikë, duke i asgjesuar ata.

3. Sikur z. Berisha të kishte ardhur në pushtet në vitet 1944-45, ai do të ishte bërë një diktator edhe më brutal se Enver Hoxha;

4. Sikur z. Berisha të kishte munguar në këto më shumë se dy dekada të tranzicionit postkomunist në Shqipëri, sot nuk do të gjendeshim në këtë pikë ku jemi, por Shqipëria do të kishte bërë një progres shumë më të madh. Politika e z. Berisha, siç kam shkruar edhe 7 vjet më parë, i ngjante më shumë autoritarizmit të Hugo Chavez-it (edhe pse pa naftën e tij), sesa ishte një politikë demokratike e largpamëse, si ajo që i ka bërë shumë vende të Europës Lindore postkomuniste pjesë të Bashkimit Europian.

Shkrimin e plotë mund ta gjeni në linkun http://gazetadita.al/prognoze-retrospektive-berisha-ne-historine-e-se-shkuares/

Re.Pu.