Falsifikime edhe në trungun familjar të vetë Ministrit të Brendshëm?!

Janë botuar disa javë më parë një listë emrash që rezultojnë shtetas shqiptarë në regjistrin e Gjendjes Civile por janë identitete fantazmë të prodhuar me falsifikim. (pati edhe një debat dje në KQZ për këtë problem).

Këto identitete (janë me mijëra) gjenden në listat zgjedhore, por nuk është vetëm ky problemi. Këto karta dhe pasaporta me emra shtetasish që nuk ekzistojnë janë prej vitesh në qarkullim, madje ka një treg të zi të tyre. Një kriminel apo një person me probleme, shqiptar ose jo, mund të blejë identitete të tillë false, të lëshuara zyrtarisht nga shteti shqiptar.

E përditshmja DITA ka botuar dje një informacion shokues: “Duke analizuar trungun familjar të vetë Ministrit të Brendshëm, rezulton se edhe në këtë trung renditet një person i cili nuk egziston – shkruan DITA dhe boton faksimile të regjistrit të shtetasve dhe listës zgjedhore ku shfaqet familja Noka nga fshati Novosej i Kukësit.

Në faksimile rezulton se një person i renditur në trungun familjar si vëlla i ministrit është identitet fantazëm. Ashtu si në mijëra falsifikime të tjera, metodologjia e përdorur është e njëjta: identiteti fantazëm është krijuar duke ndryshuar një karakter në të dhënat identifikuese (për të shmangur përplasjen në data-bazën e të dhënave të Gjendjes Civile). Në rastin e trungut familjar të vetë ministrit të brendshëm  “vëllai fantazëm” është krijuar duke ndryshuar emrin e babait nga Dalip në Dalif. Gabim i zakonshëm në regjistrim? Jo – këmbëngul gazeta duke ofruar krahasimin e dy dokumentave në regjistrin e shtetasve. Rezulton që një nga vëllezërit realë dhe “vëllai” i krijuar kanë “lindur” të dy …brenda të njëjtit vit, 1965 (!).  

DITA i ka kërkuar reagim publik ministrit Noka (ky është dhe përgjegjësi për listat, rendin dhe sigurinë) duke bërë një lojë fjalësh me mbiemrin e tij, nën titullin “trokitës”: “Nok-nok-nok, përgjigju Flamur”. Por reagim nuk ka patur. (a.n.)

http://gazetadita.al/28-maj-2013/