As Enver Hoxha nuk u fliste nxënësve të shkollave tetëvjeçare për armiqtë e tij e të partisë së tij - shkruan Nano

Nuk po bëjnë më përshtypje ca sjellje publike e politike të Berishës, që lëndojnë haptazi deontologjinë e profesionit të politikanit në një demokraci liberale; në mos, prishin e komprometojnë ca rregulla të qarta të lojës elektorale; në mos akoma, janë një dhunim flagrant i ligjeve të këtij vendi. Nuk bëjnë përshtypje, ngaqë këto sjellje janë tanimë një stil pune i tij – shkruan Mustafa Nano në editorialin e sotëm në të përditshmen SHQIP dhe shton: “Ka kohë që gazetarët merren gjithnjë e më pak me atë që bën Berisha, duke përjashtuar këtu rastet kur bëmat e tij janë të rëndësishme e të frikshme, siç ishte zëvendësimi i anëtarit të KQZ-së të propozuar nga LSI-ja…”

Nano shkruan më pas se” “shumica e këtyre zullumeve janë krejt të panevojshme” dhe përmend fjalimet përpara nxënësve:

“Fjala vjen, cili është qari i tij kur shkon dhe mban fjalime përpara nxënësve të një shkolle tetëvjeçare, dhe u thotë këtyre të fundit se “kundërshtari i tij politik nuk e do kombin, nuk i do ata fëmijë, nuk e do të ardhshmen e tyre, etj., etj”? Këtë gjë e ka bërë më shumë se një herë. Ai është qortuar nga më shumë se një zë për këtë sjellje, por ai ka këmbëngulur tek e vetja, ndonëse e di – janë të gjitha gjasat që ta dijë – se kjo që bën është e pakuptimtë, e paprecedent, është gati lapërdhare. Edhe despotë që janë shquar për mizoritë e tyre kanë qenë shumë të kujdesshëm në komunikimin me fëmijët e kësaj moshe. Unë jam mbi të 50-at, dhe më duhet të pohoj se nuk di (ndokush mund të më korrigjojë në këtë mes) që Enver Hoxha t’u ketë folur nxënësve të shkollave tetëvjeçare për armiqtë e tij e të partisë së tij, për Mehmet Shehun e Co., apo qoftë dhe për imperializmin amerikan apo revizionizmin sovjetik…”

http://gazeta-shqip.com/lajme/2013/04/25/prapa-cdo-gjesti-po...