Edhe në Gjermani, probleme me tekstet shkollore. Të huajt dhe emigrantët paraqiten me tone negative

Qëndrimi që mbajnë zyrtarët gjermanë ndaj emigracionit, ndoshta lidhet edhe me arsye kulturore, përveç atyre ekonomike. Najima El Moussaoui shkruan sot në “Deutsche Welle” për paraqitjen e të huajve në librat shkollorë në Gjermani, ku rezulton se ata trajtohen në një dritë jo shumë pozitive. “Migracioni trajtohet në librat e historisë dhe të çështjeve sociale, pjesërisht edhe në gjeografi, por kryesisht si një potencial konfliktesh dhe krizash. Shumë gjëra në libra janë prezantuar nga perspektiva e shoqërisë dominante, tha drejtuesja e studimit "Migracioni dhe Integrimi", Inga Niehaus. Shembujt që janë sjellë në studimin që referon autorja e shkrimit paraqesin libra ku shtrohen pyetje të tipit: "Çfarë përvojash keni me të huajt?” Në një libër tjetër shtrohet pyetja, nëse shoqëria multikulturore është një bekim apo mallkim”. Janë analizuar 65 libra shkollore, për klasën e IX dhe X nga Bavaria, Berlini, Brandenburgu, Renania Veriore-Vestfalia dhe Saksonia me vëmendje te librat e historisë, gjeografisë dhe çështjeve sociale. Studimi merr parasysh edhe faktin se në Gjermani, 1/3 e nxënësve janë me prejardhje emigrantësh.
http://www.dw.de/librat-shkollorë-në-gjermani-paraqesin-me-tone-negative-të-huajt-dhe-migrantët/a-18324037