Dhuna e policisë, A. Hoxha: “Ky është shtet delenxhi”. Lubonja: “Nuk kemi shtet policor, por shtet rrugaçësh”. Stefani: “Ngjarjet janë skandaloze, por ka një vëmendje të shtuar ndaj policisë”

Në “Opinion” është diskutuar për incidentet e shumta ku janë përfshirë edhe përfaqësues të Policisë së Shtetit. Vëmendja është përqendruar te sjellja e policisë, te raporti i saj me ligjin dhe dinjitetin e qytetarit, që paraqet shumë probleme. Analisti Artan Hoxha ka shprehur mendimin se në kushtet kur Policia po përdoret për një sërë operacionesh, që përndryshe mund të realizohen nga inspektoriate civile, po përdor dhunë joproporcionale, por ndaj të dobtëve, mund të thuhet se “nuk kemi një shtet policor, por një shtet delenxhi”. Andrea Stefani ka replikuar se ka një vëmendje dhe kritikë të madhe ndaj policisë, ndonëse kjo e fundit ka arritur jo pak rezultate. Një aludim ky që lufta ndaj krimit, mund të ketë prodhuar këtë lloj sulmi. Pa mohuar ekseset dhe problemet, Stefani ka pranuar se është disi e çuditshme që ndërkohë që kërkohet testim për mjek e infermierë, nuk po kërkohet testim për policinë. Nga ana e vet, Fatos Lubonja, ka sjellë në kujtesë faktin se ka shumë të dhëna që vijnë nga e kaluara, ku shefa komisariatesh kanë paguar shumë për t’u emëruar. Për këtë arsye Lubonja ka deklaruar se “nuk mund të them se ky është shtet policor, por një shtet rrugaçësh, banditësh”.
s.z