Cianuri dhe tregu i “Dinamos”, përse bashkia nuk thotë shkoqur: Kjo zonë do urbanizohet?

Lajmi i ekzistencës së rreth 700 kg cianur në një depo pranë tregut ushqimor të ish uzinës “Dinamo”, u shoqërua me vendimin për zhvendosjen e kësaj sasie të mbetur nga veprimtaria e dikurshme e uzinës. Paskëtaj erdhi një njoftim i Ministrisë së Bujqësisë, e cila vendosi të kontrollojë ndikimet që mund të jenë shkaktuar në mjedisin përreth. Reagimi i ministrisë ka ardhur pas kërkesës së Bashkisë që të kryhen analizat, këqyrjet dhe verifikimet e nevojshme, për të vlerësuar ndikimin mjedisor të zhvendosjes së lëndës helmuese. Mirëpo tregu ka qëndruar hapur, siç raporton TCH, ndërkohë që tregtarët kanë deklaruar se në fakt, sasia në fjalë ndodhej tek ish uzina “Dajti”, nja dy kilometra larg tregut, ndërsa njoftimi është bërë në mënyrë tendencioze nga bashkia e Tiranës. Kjo e fundit kërkon ta zhvendosë aktivitetin e shumicës në një pikë të ngritur enkas në autostradë, ndërsa zona në fjalë, nga më të lakmuarat për ndërtime, do të kthehet në truall ndërtimi. Por tregtarët thonë se nëse zhvendosen në zonën e re diku nga kthesa e Kamzës, tregtia do të pësojë rënie drastike.

Që bashkia ka synim ta shndërrojë atë territor, kjo është e qartë, siç është i tillë edhe konstatimi se mjediset e këtij tregu lënë shumë për të dëshiruar. Nuk do të ishte më e udhës që bashkia ta njoftonte hapur projektin (aq më mirë nëse kërkon dhe bashkëpunimin e pushtetit qëndror), pa këto manovra anësore që sjellin edhe panik?

a.k