Bushati për stoqet kimike siriane: SHBA na kontaktoi, por s’e kemi vendosur. AKIP kërkon referendum

Ministri i Jashtëm Ditmir Bushati ka folur për gazetën franceze “Le Monde” pas takimit që pati dje në Paris me homologun e tij francez, Laurent Fabius. Bushati pohoi se Shtetet e Bashkuara realisht i kanë kërkuar Shqipërisë që të organizojë në tokën e saj shkatërrimin e arsenalit kimik sirian. “Por nuk kemi marrë ende asnjë vendim deri më sot. Nuk kemi zbritur as në nivelin e diskutimeve teknike”, citohet të ketë thënë Bushati. Sipas gazetës franceze, Tirana po e studion ofertën me kujdes. Shqipëria paraqet disa avantazhe, sidomos gjeografike, të cilat e lehtësojnë një transport të mundshëm të stoqeve kimike në rrugë detare. “Le Monde” thotë se Shqipëria disponon një eksperiencë të veçantë në fushën e neutralizimit të arsenalit kimik, pasi në vitin 2007, është bërë vendi i parë që ka shkatërruar tërësisht arsenalin e trashëguar regjimi komunist, afërsisht 16 ton gaz kimik.

Ministri i Mbrojtjes së asaj kohe, Mediu, ka thënë në shtypin shqiptar se shkatërrimi i këtyre stoqeve jo vetëm u financua nga SHBA me 35 milionë euro, por ishte Departamenti amerikan i Mbrojtjes që kreu këtë operacion, ndërsa forcat shqiptare vetëm ruajtën perimetrin. “Pra ne nuk kemi asnjë përvojë”, konkludon Mediu. Por duke e marrë si fakt të kryer që edhe këtë rradhë gjithçka do ta kryejnë amerikanët, duket se ngërçi më i madh i qeverisë Rama është fakti që kjo “dhuratë” siriane i vjen sapo ndryshoi ligjin e importit të mbetjeve. Ndaj për çështjen e lëndëve kimike siriane Rama ka kundër dhe Aleancën qytetare AKIP, që ishte në mëdyshje për ta ndërprerë veprimtarinë pas ndryshimit të ligjit të mëparshëm, por tani kërkon referendum popullor për stokun sirian.

a.k