Borxhi i jashtëm, Banka Botërore kreditori kryesor i Shqipërisë

Në fund të muajit mars, Shqipëria kishte një borxh të jashtëm në vlerën e 2.6 miliardë eurove. Sipas të dhënave zyrtare nga Ministria e Financave, borxhi është rritur me rreth 1.9 për qind që nga fundi i vitit 2012. Pjesën dërmuese të strukturës së borxhit e zë borxhi shumëpalësh, i marrë nga institucionet ndërkombëtare dhe bankat e zhvillimit, që është afërsisht 1.5 miliardë euro apo 56% të totalit. Kreditori kryesor i Shqipërisë është Agjencia Ndërkombëtare e Zhvillimit, IDA, pjesë e grupit të Bankës Botërore, që ka për qëllim uljen e varfërisë. Sipas të dhënave nga Ministria e Financave, vlera e borxhit të IDA-s është 665 milionë euro. Nëse përfshijmë edhe huanë e marrë nga Banka Ndërkombëtare për Rindërtim dhe Zhvillim, detyrimi total ndaj grupit të Bankës Botërore shkon në 711 milionë euro ose 27 për qind e borxhit të jashtëm. Ndër bankat e tjera të zhvillimit, një mbështetje të rëndësishme me kredi për Shqipërinë kanë dhënë edhe Banka Europiane e Investimeve, me 222 milionë euro dhe Banka Islamike për Zhvillim me 197 milionë euro. Një pjesë të rëndësishme në strukturën e borxhit të jashtëm zë edhe huaja e marrë prej kreditorëve privatë. Vlera e këtij borxhi është gjithsej 530 milionë euro ose 20 për qind  e stokut të borxhit të jashtëm. Te kreditorët privatë përfshihen blerësit e eurobondit prej 300 milionë eurosh dhe banka të huaja tregtare, të cilave shteti shqiptar u detyrohet rreth 230 milionë euro. Rreth 629 milionë euro apo rreth 24 për qind e totalit janë borxh dypalësh, që është akorduar nga qeveritë e vendeve të ndryshme. Kontribuesit kryesorë janë Italia, me 220 milionë euro dhe Gjermania, me 167 milionë euro. E.Shehu