Berisha për skandalin e Interkonjeksionit: Është klithmë e mafias kundër meje

Pas denoncimit të gazetës Zëri në Prishtinë, erdhi përgënjeshtrimi i të birit të kryeministrit. Por nga Zëri bëjnë me dije se lajmin nuk e kanë lëshuar në erë; përkundrazi, e kanë të kopsitur nga ana dokumentare. Ndërkohë ka dalë informacioni se banka gjermane që financonte linjën e Interkonjeksionit, tok me Ministrinë tonë të Ekonomisë, kanë refuzuar vendimin e marrë nga Operatori i Sistemit të Transmetimit të drejtuar nga një ish-roje trupi i Berishës për të njohur si fitues të tenderit kompaninë boshnjake që doli në vend të dytë. Edi Rama nuk u mendua dy herë të kapej pas këtij skandali, dhe u bë u gjallë si kurrë më parë kundër qeverisë: shpejt, i sigurtë, i prerë.

Në këto rrethana shfaqet Berisha, nervoz dhe konfuz. Shikoni se çfarë thotë:

“Kjo ishte një klithmë e radhës e mafies së dëshpëruar. Për Sali Berishën mafia nuk ka atdhe, atdheu i saj është shpella ku ndahen paratë e krimit. Mafia nuk ka fytyrë, ka vetëm fytyrën e krimit. Mafia nuk ka moral, ka vetëm trofenë e plaçkitjes. Çfarë di unë? Di që ka pasur një ankesë në Këshillin e Ministrave. Departamenti ka bërë kontrollin, ka marrë vendimin dhe ia ka përcjellë autoritetit kontraktues. Ka një motiv. Firma e dytë, për të cilën OST-ja dhe drejtuesi i saj insistoi të shpallet fituese, ka bërë një ofertë prej 27 milion eurosh kundrejt 36 milion eurove që është oferta e parë. Se kush navigon në këtë 1/3, nuk dihet. Por mafia nuk ka atdhe. Nuk ka formë, as banesë. Iniciator jam unë për këtë linjë.... Sot u kujtua edhe Rama të bëhet patriot më së fundmi, por ra në grackë. I doli, notonte dhe ky tek 30%-shi, aty është pika e mjaltit.”

Re.Pu.