Berisha i rikthehet nivelit të ulët të papunësisë

Në mbledhjen e sotme të grupit parlamentar te PD-se, Berisha qesëndisi përsëri Ramën rreth shifrës së deklaruar prej këtij të fundit për nivelin e papunësisë në vend. Ai tha se shifra reale e papunësisë mund të jetë edhe më e ulët se sa e raporton INSTAT-i. Por sa e besueshme është shifra prej 142,484 të papunësh që raporton INSTAT-i?

Në Maqedoninë fqinje, e cila ka një popullsi me strukturë të ngjashme me ne, por sa 2/3 e popullsisë në Shqipëri, Instituti i Statistikave raporton një shifër prej 297,986 të papunësh. Pra, dyfishin e të papunëve të Shqipërisë. Më tej, Instituti i Statistikave të Maqedonisë raporton se ata që kërkojnë punë (të papunët) përbëjnë 20.6% të atyre që nuk janë të punësuar (për arsye moshe, për arsye shkolle, për arsye familjare, për pamundësi gjetje pune, etj.). Ndërsa sipas INSTAT-it tonë, në Shqipëri kjo shifër është në nivelin e pabesueshëm 7.3%. Në qoftë se aplikojmë përqindjen e Maqedonisë (e cila ka një strukturë të ngjashme popullsie me ne), rezulton se ndër ata që nuk janë në marrëdhënie pune në Shqipëri (sipas INSTAT-it janë 1,903,689 vetë), rreth 400 mijë duhet të jenë në kërkim të një vendi pune në zonat urbane (pavarësisht se vetëm 142.5 mijë thotë INSTAT-i se janë regjistruar në zyrat e punës). Ndërsa në zonat rurale, INSTAT-i quan të punësuar këdo që punon një copë tokë – praktikisht të gjithë fshatarët ne moshe pune.

Kjo mund të jetë arsyeja që në faqen për Shqipërinë në CIA-The World Factbook, është vendosur ky shënim: Papunësia zyrtare është 13.4%, por papunësia reale mund të kalojë 30%, sepse në zonat rurale mbizotëron bujqësia thjesht për mbijetesë.

E.Zaloshnja