Ben Blushi: “Katedra e letërsisë është e politizuar”. Por pedagogët mbrojnë tezën e kundërt

Dje në Tiranë, në ditën ndërkombëtare të librit, janë organizuar një numër veprimtarish, për të cilat kanë njoftuar të gjitha të përditshmet. Këto të fundit ishin fokusuar sot më së shumti tek një polemikë mes Ben Blushit, këtë herë në rolin e shkrimtarit, dhe pedagogëve të letërsisë në Fakultetin e Historisë e të Filologjisë. Blushi, autori i veprave Të Jetosh në Ishull, Otello, Arapi i Vlorës, dhe Shqipëria, ka marrë fjalën dhe citohet të ketë thënë se “autorët shqiptarë meritojnë vëmendje, dhe duhet ndarë libri nga veprimtaria e shkrimtarit, pasi shpesh shkrimtarët paragjykohen për shkak të rreshtimit e të jetës së tyre politike; katedra e letërsisë nuk duhet të jetë e politizuar”.

Pedagogët nuk i kanë pranuar vërejtje të tilla. Persida Asllani citohet të jetë shprehur se “në departamentin e letërsisë janë tri lëndë që trajtojnë letërsinë bashkëkohore dhe autorët e saj; e përveç kësaj, tek periodiku Letra, botim i këtij departamenti, është publikuar një shkrim kritik mbi romanin Shqipëria”. Në të njëjtën linjë ka ecur dhe pedagogu tjetër, Agron Gjekmarkaj. “Blushi erdhi këtu, fyeu pedagogë e studentë ….Unë kam shkruar për romanin Shqipëria, dhe [nuk ia kam vënë në dukje] një numër naivitetesh të librit”, tha ai. Nuk saktësohet, nëse Blushi ka qenë i pranishëm në kohën që janë bërë këto sqarime.

Re.Pu.