Basha imiton Olldashin: Na kanë blerë votat. Por s’e përmend Metën

Olldashi e Basha e kanë gjetur lejtmotivin e fushatës së tyre elektorale brenda partisë. Ka qenë Olldashi i pari që e ka nxjerrë si justifikim të humbjes këtë avaz në programin Opinion të Tv Klanit. “Votat tona i mori LSI-ja, i bleu me lekë”, tha ai në thelb.

Duke qenë se kjo tezë ka ngjitur ca në të djathtë, asaj ka zënë t’i mëshojë dhe Basha tanimë. “Mazhoranca e re vjen nga një votë e deformuar me mjete jo morale që përbën një rrezik të vërtetë për demokracinë”, ka thënë Basha në Gjirokastër. Bëri pak çudi kjo deklaratë, pasi dihen marrëdhëniet e mira të Bashës me Metën. Mirëpo, në ndryshim nga Olldashi, Basha nuk u ka vënë autor mjeteve jo morale dhe votës së deformuar. Nuk e ka përmendur LSI-në; as Ilir Metën.

Do ta përmendë sërish këtë fakt? Kjo është një kërshëritë e kësaj fushate. Nëse po, i bie që të prishet me Metën, për rrjedhojë i komplikohet drejtimi i Bashkisë. Nëse jo, i bie që Olldashi të fitojë “kredenciale morale” në këtë garë.

Re.Pu.