Bankat, xhama anti-plumb nëpër sportele

Pas grabitjeve të shpeshta të bankave gjatë viteve të fundit, nga njëra prej të cilave mbeti e vrarë edhe një qytetare, Ministria e Brendshme duket se po përgatit një draft për rritjen e sigurisë në banka. Lajmi jepet nga news 24, sipas të cilit, autoritetet e rendit do t’i kërkojnë bankave të nivelit të dytë që të marrin masa të sigurisë së lartë për filialet e tyre duke vendosur xhama anti-plumb, kamera sigurie, etj.

Në fakt, për momentin është Rregullorja për Elementët Minimal të Sigurisë Fizike e Bankës së Shqipërisë ajo që përcakton detyrimet që duhet të përmbushin bankat për sigurimin e parave dhe ambienteve të brendshme të saj. Rregullorja përcakton me detaje vendin se ku duhet të vendoset kasaforta, vendosjen e kamerave si edhe elementet e sigurisë në zonën e arkëtarëve. Rregullorja gjithashtu parashikon edhe mbajtjen e një kasaforte të vogël pranë arkëtarëve me kod. Pra, rregullorja aktuale kujdeset më shumë për vlerat monetare se sa për punonjësit.

Vendosja e xhamave anti-plumb, ashtu siç konfirmon edhe lajmi pritet të rrisë kostot për bankat, por mbi të gjitha do të mundësojë një siguri më të madhe për punonjësit në raste grabitjesh.

S.E.